मैलाचा दगड

आपण आपलं काम प्रामाणिकपणे करत राहायचे, एक मोठी संधी आयुष्याच्या एका टप्प्यावर तुमची वाट पाहत उभी असते. कुणीतरी दूरवरून आपली निरीक्षणे नोंदवत असतो. योग्य वेळ आली की तुमच्यातला हुनर ओळखून आपसूक तुमच्यासाठी रेड कार्पेट अंथरलं जातं. आजवर हजारो व्याख्याने झालीत. गाव, तालुका, जिल्हा, मेट्रो सिटी, मंदिर, बौद्ध विहार, मस्जिद, शाळा, महाविद्यालये अशा अनेक ठिकाणी व्याख्याने केलीत. पण येत्या १ सप्टेंबर २०२३ रोजी प्रथमच कॉर्पोरेट कंपनीसाठी मायक्रोसॉफ्ट टिम्स मार्फत ऑनलाइन व्याख्यान देणार आहे.

काही दिवसांपूर्वी जापा इंडिया कंपनीचा फोन आला आणि त्यांनी त्यांच्या कर्मचाऱ्यांसाठी फार्म कनेक्ट सेशनमार्फत `Team Victory : Lessons from Chatrapati Shivaji Maharaj’ या विषयावर मार्गदर्शनासाठी मला निमंत्रित केलं. अर्थात या निमंत्रणाकडे मी एक मोठी संधी म्हणून पाहतोय. वक्तृत्वाच्या साधनेचं मी एक तप पूर्ण केलंय, आता माझ्याकडे असलेल्या वक्तृत्व आणि लेखन कौशल्याचा फायदा जर कंपनीला त्यांच्यासाठी राबणाऱ्या हातांचा उत्साह वाढवण्यासाठी होणार असेल तर भविष्यात माझ्यासाठी हा मैलाचा दगड ठरेल हे नक्की.

संधी कोणतीही असू द्या मी ताकदीने उभा असतोच. कंपनीने टाकलेल्या जबाबदारीचे सोने करण्याचा प्रयत्न असेल. तुर्तास तरी अभ्यास जोरात सुरू आहे. आरंभ है प्रचंड. 

विशाल गरड

३० ऑगस्ट २०२३, पांगरी