| संविधान ©

संविधानाचा आत्मा समजलेलं भारतीय राज्यघटनेचं सर्वात महत्वाचं पान म्हणजेच प्रस्तावना होय. या पानाकडं ज्यावेळेस मी एच कलाकार म्हणुन निरखुण पाहतो तेव्हा न्याय, स्वातंत्र्य, समानता आणि बंधुता या व्यतिरिक्तही मला आणखी काही शब्दांचा बोध होतो. आजवर आपण हि संविधानाची प्रस्तावना खुपवेळा वाचली असेल परंतु या प्रस्तावनेला असलेली चौकट सुद्धा तितकीच अर्थपुर्ण आहे हे बारकाईने पाहिल्यानंतर आपल्या लक्षात येतं. प्रस्तावनेच्या या लाल रंगाच्या कलाकुसरीतुन आपणाला सौदर्य, साहस, शक्ती आणि अखंडता पहायला मिळते राष्ट्रीय पक्षी मोर आणि राष्ट्रीय फुल कमळ हे भारत देशाच्या सौदर्याचं प्रतिनिधित्व करतात, राष्ट्रीय प्राणी वाघ हा आपल्या देशाच्या धैर्य आणि साहसाचं प्रतिनिधित्व करतो तर जमिनीवरचा सर्वात मोठा प्राणी हत्ती आपल्या देशाचे सामर्थ्य आणि शक्तीचं प्रतिनिधित्व करतो. विविध फुलांच्या वेली भारताच्या अखंडतेचे प्रतिनिधित्व करतात.
आपल्या भारतीय संविधानाची प्रस्तावना हि फक्त शब्दांनी तयार झालेली नसुन ती लेखन आणि चित्रकलेचा एक उत्तम नमुना आहे असे मला वाटते. कदाचित या कलाकुसरीचा अर्थ राज्यघटनेनुसार वेगळा असु शकतो परंतु एक सर्वसामान्य कलाकार आणि लेखक असल्याने थोडासा विचार करून सुचलेलं आज संविधान दिनाच्या निमित्तानं आपणासमोर मांडावं वाटलं म्हणुन हा अट्टाहास. कोणत्याही विषयावर विचार करण्याचे, बोलण्याचे व लिहिण्याचे मला स्वातंत्र्य दिल्याबद्दल एक वक्ता व लेखक म्हणुन मी या संविधानाचा आयुष्यभर ऋणी राहील.

लेखक : प्रा.विशाल गरड (पांगरीकर)
दिनांक : २६ नोव्हेंबर २०१६ (संविधान दिन)
सकाळी : ११ ते १२ वाजता